لما تلاقي الواحد يقولك يا سلاااااااااام علي كوبايه الشاي بعد اكله السمك ، ولا فنجان القهوه مع حته شيكولاته واغنيه للست ام كلثوم ياااااااااااه يا سلاااااااااام والله ده حاجه اخر عظمه.ولا كيس الكرانشي بالشطه مع البيبسي اصله بيزود مفعول الشطه
وقيس علي كده ملايين التوليفات اللي ليها عند صاحبها مكانه الهويه نفسها.طبعا التوليفات برده زي اي حاجه في الدنيا ليها ايديولجيات وحيثيات وكلام فاضي من ده كتير . يعني مثلا في توليفات قوميه زي مثلا السمك مع الرز الاحمر او الجبنه والبطيخ .هذه التوليفات هي من صميم الحضاره المصريه ، مافيش بيت في مصر بياكل الرز الاحمر -اللي بيتعمل ببصل عشان الساده الرجال-مع اي حاجه غير السمك ولا يمكن تغيير التوليفه دي . وطبعا في توليفات شخصيه اللي هي بتدل علي تفرد الشخص وتميزه ويمكن تكون اثباته الوحيد لذاته. فكرت كتير بصراحه في الصله اللي بتتكون بين اشياء ليس لها اي علاقه ببعض وامتزاج العناصر المختلفه اللي بتؤدي في الاخر لما يدعي المزاج .طبعا ماقدرتش اوصل لحاجه لاني مش من محبي الاجابات لانها بتقفل باب النقاش والتفكير والتساؤل ولاني بحب جدا افكر ولاني عارفه ان وصولك لاجابه علي الاسئله دي ينزع من الحياه كل متعه فانا قررت اني اكتب النهارده عشان اثير انتباهكم للعالم المثير للجدل وهو عالم التوليفات البشريه من غير ما اتحفكم برأيي او تفسيري الألمعي للظاهره دي
ليست هناك تعليقات:
إرسال تعليق